Dalaga nahilo sa kamoteng kahoy

NILANDING sa Northern Mindanao Medical Center (NMMC) ning siyudad sa Cagayan de Oro ang 20 anyos nga dalaga human nahilo sa gikaon nga kamoteng kahoy niadtong Miyerkules mga alas 4:00 sa hapon sa Manolo Fortich, Bukidnon.

Gidala sa NMMC si Joralyn Decena, 20, dalaga, residente sa susamang dapit.

Nasayran nga naglain ang tiyan sa biktima ug grabe ang suka niini human nakaon ang gilutong kamoteng kahoy nga gikuha sa iyang amahan gikan sa ilang umahan.

Saysay sa inahan niini nga wala siya kahibalo nganong naglain ang tiyan sa iyang anak nga anad naman sila nga mukaon ug kamoteng kahoy labina panahon nga dili makapalit ug bugas maoy ilang kan-on.

Pipila na usab siya nakadungog nga adunay nahilo sa maong lagutmon ug nadala sa balay tambalanan ug wala siya nakatuo nga mabiktima ang iyang anak niini.

Ang mga silingan nagduda nga dili insakto ang pagkalimpyo ug pagluto niini hinungdan nga nagsakit ang tiyan sa biktima.

Unang gidala ang biktima sa duol nga klinika sa dapit apan tungod kay migrabe ang sakit sa tiyan niini gidala na lamang denhi sa ospital sa siyudad.

Biktima ubos pa sa obserbasyon sa doktor sa pagsulat ning balita.