65 anyos nabanggaan sa polis

NILANDING sa balay tambalanan ang 65 anyos nga lola human nabanggaan sa motorsiklo nga gimaneho sa usa ka polis niadtong Huwebes mga alas 10:50 sa gabii sa Agora, Lapasan ning siyudad sa Cagayan de Oro.

Giila ang biktima nga mao si Dem Flores, 65, minyo, residente sa susamang dapit.

Nasayran nga patabok na unta ang biktima sa dalan dihang kalit lang kining nabanggaan sa kusog nga mipadagan nga motorsiklo nga uwahing nahibaw-an nga mao si Police Officer 1 Ismael Chebas, lumad nga taga Zamboanga del Sur.

Gipasabot usab sa polis nga wala niya gituyo ug namatikdan ang kalit kaayong pagtabok sa biktima hinungdan nga nasapon kini sa iyang motorsiklo.

Nakaangkon og pangos ingon man bun-og sa lawas si Flores, kinsa gidali usab pagdala sa polis sa Northern Mindanao Medical Center ug kinsa ubos pa sa obserbasyon sa mga doktor.

Ang kaso giimbestigahan karon sa roads and Traffic Administration. (SVB)