Giluba sa cafgu, patay

PATAY ang usa ka lalaki human giluba sa kanhi membro sa Cafgu (Citizen Armed Force Geographical Unit) niadtong Lunes mga alas 6:30 sa gabii sa Barangay Tignapoloan ning siyudad sa Cagayan de Oro.

Giila ang biktima nga mao si Kiking Agdao, hingkod ang edad, residente sa susamang dapit.

Gitumbok nga suspetsado mao si Popoy M. Labita, nagpuyo sa susamang dapit ug kanhi miyembro sa Cafgu.

Si Kapitan Renato Rances nisaysay nga nagkuyog ang duha niadtong tungora kay nahalinan man og saging.

Nagkasabot nga mag-videoke ug gisagulan dayon og inom-inom nga mipaingon sa panagbikil ug nisangpot sa pagbinayloay ug dili maayo nga mga pulong.

Miresulta dayon sa pagpangluba. Si Labita nakakuha og kutsilyo dayon deretso nga giluba ang biktima.

Gani nakadagan pa ang biktima apan gigukod niini paingon sa gawas sa videokihan ug didto giutrohan og dunggab nga maayong pagkaigo sa mga fatal area maoy hinungdan sa iyang hinanaling kamatayon.

Matud ni Rances nga gitangtang si Labita sa iyang pagka-Cafgu tungod sa dili maayo nga taras niini kung mahubog.

Samtang daw labad ug magmaoy si Agdao kung kini usab mahubog hinungdan ang katawhan sa dapit nakasulti nga nagka-engkwentro na gyod ang duha nga gikamatay hinuon ni Agdao.

Ang suspek detinado na karon sa Police Station 8 sa Lumbia kinsa gikatakdang pasakaan og kasong murder.