Gibuk-an ug ulo

PATAY ang usa ka 28 anyos nga lalaki nga giingong iladong kawatan human gipusil sa wala mailang suspek niadtong Martes sa gabii sa Poblacion, lungsod sa Catarman, probinsya sa Camiguin.

Gibuk-an sa iyang ulo si Junie Lopez, atubangan mismo sa iyang inahan niadtong gabhiona.

Gibutyag ni Police Inspector Gilbert Balderado hepe sa Catarman Police Station nga nahitabo ang pagpamusil sa puloy-anan niini sa Barangay Poblacion kinsa kuyog niadtong tungora ang iyang inahan nga nanihapon.

Kalit lang nga gidul-itan ang ulo niini ug gipusil makatulo ka higayon hinungdan nga dead on the spot ang biktima.

Matud ni Balderado nga kini ang ikaduhang kaso nga gipusil ang biktima ug gipana na usab kini tungod kay naila kining kawatan sa dapit. Ang biktima lumad nga taga siyudad sa Gingoog, Misamis Oriental ug nibakwit lamang sa maong lugar.

Daw kasagaran sa mga gakawaton niini mao ang mga binuhing mananap, lubi ug uban pa nga ginagmay nga kawat nga misiaw sa maong dapit niining panahona.

Gani niadtong Biyernes detinado sa maong buhatan ang suspek tungod gihapon sa kasong pagpangawat.

Dugang ni Balderado nga bisan ug kanunay kini nga madakpan ug mapriso tungod sa susamang kaso walay mga biktima nga mopadayon sa pagpasaka niini ug kaso tungod kay maluoy ug mapasaylo raman usab kini.

Nahipos sa mirespondeng kapolisan gikan sa Catarman Police Station ang pipila ka basyo sa 9 mm. pistol sa crime scene.

Wala maila ang suspetsado labina mismo ang inahan sa biktima wala gihapon nakaklaro sa suspek tungod kay igo lamang kining gidungawan sa suspek. (Stephanie V. Berganio)