Illegal lotto outlets naghitak

BUOT nga ipasira ug ipasikop sa Philippine Charity Sweepstakes Office (PCSO) sa Northern Mindanao ang mga naghitak nga illegal lotto outlet sa nagkalain-laing dapit ning siyudad sa Cagayan de oro.

Kini ang gibutyag ni Konsehal Adrian Barba, kinsa chairman sa komite sa games and amusement.

Gibutyag ni Barba nga atol sa ilang panagtigom, nagpaabot kaniya si PCSO Regional Director Mario Felisco ug miasoy nga unta mahunong na ang operation niining mga illegal nga lotto outlet nga nagkadaghan denhi sa siyudad.

Gibutyag niini nga basi sa ilang imbestigasyon ug pakisusi sa PCSO, mokabat sa 20 kapin ka mga illegal lotto outlet sa siyudad ang nag-operate nga walay permit. Hinungdan nga nangayo kini og giya sa siyudad nga unta mahunong kining mga kalihokan nga illegal sa pipila ka nangulo niini.

Si Barba dili pa makahatag sa mga pangalan ug mga nahimutangan sa mga illegal lotto outlet sa siyudad human wala pay listahan nga gihatag kaniya ang PCSO.

Nakig coordinate na usab kini kang Konsehal Ian Mark Nacaya kinsa chairman komite sa police, fire and public safety aron ang kapolisan mapahibalo ug maaksyunan kini.

Si Nacaya nibutyag nga niadtong 2010, gipangsikop ang maong illegal outlets ug napasakaan og kaso apan gikatingad-an niini nga nibalik na usab karon hinungdan nga nagpasalig kining operasyunan sa dili madugay.