4 ka tulis natala

UPAT ka mga kaso sa pagpanulis ang natala sa nagkalain-laing presento sa kapolisan ning dakbayan sa Cagayan de Oro.

Unang biktima sa pagpanulis mao ang tinun-an nga si Michenie Liwayon, 19, dalaga, taga Balulang ning siyudad sa Cagayan de Oro.

Nagpatabang sa Police Station 3 (PS3) sa Agora ang biktima human gitulis kini sa duha ka wala mailang suspetsado samtang sakay og motorela niadtong adlawng Huwebes mga alas 10:00 sa gabii.

Saysay ni Liwayon nga daan na nga anaa sulod sa motorela ang duha ka mga lalaki nga nagpatuong pasahero. Apan paghidangat sa dalan Corrales Extension, kalit lang nanion og kutsilyo ang usa niini ka lalaki ug niaksyon nga ipahilom siya kay dunggabon kung magsaba.

Hinay nga gipangayo sa duha ang iyang iPhone ug dihang nakuha na ang tinguha, nimando kini sa driver nga magpahunong. Usa pa dayon gisultihan sa biktima ang driver nga gitulis siya sa pasahero. Nakurat ang driver ug kini mismo maoy nag-uban sa biktima sa Police Station 3 (PS3) sa Agora.

Laing biktima sa pagpanulis maoy si Rubert Mandang ug Ariza Palahudin, pulos hingkod ang edad, taga Nazareth ning siyudad.

Nagpatabang sa Police Station 2 (PS2) sa Cogon ang duha human gitulis samtang nagbaklay. Dala sa suspek ang kutsilyo nga maoy gition kanila, hinungdan nakuha ang kantidad nga P4 mil kapin uban sa mahalon nga cellphone.

Tungod kay nakahatag man ang mga biktima og deskripsiyon sa suspek, gioperasyunan kini sa kapolisan nga miresulta sa pagkasikop sa gitumbok nga tulisan nga giilang si James Racasa, hingkod ang edad, taga Barangay 31, ning siyudad, kinsa nagtingkagol na karon sa Maharlika Detention Cell.

Niadtong Miyerkules, usa ka Corazon Turno, 63, taga Capisnon, Kauswagan ning siyudad ang gitulis sa mokabat lima ka mga suspetsado. Gitionan og kutsilyo ang biktima ug giingnan og tulis, dihang bout pa nga pugngan sa biktima ang iyang bag labina anaa sa sulod ang nagkadaiyang importanteng butang gipugos kini sa pagbira sa mga suspek.

Nakuha sulod sa bag ang wedding ring mobalor og P15 mil, P8 mil nga cash ug uban pa nga mga importenteng gamit.

Deretsong giresponde sa Police Station 4 (PS4) sa Carmen human nahatag usab niini ang deskripsiyon sa mga suspek ug gipangita ang mga suspetsado ug diha dayon nasikop ang gitumbok nga mga tulisan nga mao sila si Marlowe H. Sagun, 37, taga NHA Phase I, Kauswagan; Jobin Tugot, 26, sa Piaping Itum, Macabalan; Walter P. Sangalang, 37, sa Zone 1 Punta, Bonbon; Giovanni Padilla, 34, sa Licoan Street; ug usa ka 15 anyos nga taga Barangay Carmen.

Gikatakdang pasakaan og kaso kagahapong adlawa ang mga suspek.

Uwahing pagpanulis natigayon sa Tiano-Yacapin St, ning siyudad diin nakuha gikan sa duha ka mga biktima ang kantidad nga P20 mil.

Ang biktima giila nga mao si Jacky Chan, taga-Barangay Camaman-an ning siyudad kinsa kuyos sa iyang bana niadtong tungora.

Ang suspek giingong armado ug kalibre 38 human nadeterminar sa biktima ug maoy gitionn kanila.

Si Chan dihang midumili sa paghatag sa ilang kantidad ang gibun-og pa sa tulisan. Ang kaso gisunod na sa Police Station 2 sa Cogon sa pagsulat ning balita.