P150T reward gihanyag masapon lang ang killer

MOKABAT sa P150 mil ang andam buhian sa pamilya matudlo lang ang nagpusil patay sa negusyante nga si Jasper Tan niadtong Sabado sa gabii diha sa Capistrano-Jr Borja Street ning siyudad sa Cagayan de Oro.

Ang inahan niini nga si Fely Tan dili pa makadawat sa daling kamatayon sa iyang 34 anyos nga anak tungod kay wala silay mahuna hunaan nga gikaaway niini labina nga buotan kini nga tawo.

"Dili gyod ko makadawat nga in-ato ang kamatayon sa akong anak, grabe kaayo ang pagpatay niya," butyag ninii sa usa ka sibyaan sa radyo. Ug nisulti nga andam silang mopagawas og P150 mil matudlo lang ang nagpatay sa iyang anak.

Gani magsige kini og hilak sa kalit nga kamatayon sa iyang anak.

Sa iyang bahin ni Police Superintendent Danildo Tumanda kinsa hepe sa Police Station 1 (PS1) sa Divisoria gibutyag niini nga dakong tabang alang kanila ang pagpagawas og kantidad sa pamilyang Tan. Labina makakulang sa ilang imbestigasyon ang walay pagpakabana sa nakasaksi.

Gibutyag niini nga adunay nakakita gyod sa insidente apan tak-om lamang ang mga baba sa kahadlok nga maangin. Gisiguro ni Tumanda nga mogawas ang witness labina hinay hinay na nga nakig-coordinate kanila ning panahona. Naglaom kining maaksyunan kini sa daling panahon aron mahatag ang hustisya sa dili tiaw nga kamatayon sa biktima.

Si Jasper E. Tan ang gipusil samtang anaa kini sulod sa iyang sakyanan nga Toyota Corolla. Unang gipusil kini sa iyang ulo dihang naligid sulod sa driver seat gitiwasan sa iyang tangkugo ug liog nga bahin hinungdan sa iyang hinanaling kamatayon.

Duha ka mga armado og kalibre .45 ang suspetsado nga daling misibat human sa pagpamusil sakay sa XRM nga motorsiklo. (SVB)