Gilugos sa bayaw

USA ka 13 anyos ang mipahigayon og medical examination sa Northern Mindanao Medical Center (NMMC) ning siyudad sa Cagayan de Oro human giingong gilugos sa bayaw niini makatulo ka higayon didto sa lungsod sa Talakag, Bukidnon.

Ang biktima tagoan na lamang sa ngalan nga Ella, residente sa susamang dapit.

Saysay sa 13 anyos nga natulog na sila niadtong Biyernes sulod sa lawak apan mga kaadlawon sa Sabado, kalit lang mitupad ang iyang bayaw kinsa bana sa iyang magulang.

Nakurat kaayo ang biktima tungod kay nangatulog naman ang iyang igsuon usab niadtong tungora.

Kalit gitabunan niini ang iyang baba ug gihunghongan nga dili magsaba.

Apan natingala pag-ayo ang biktima dihang gisugdan siya og hikap niini sa iyang pribadong parte sa iyang lawas.

Misuway og siyagit ang biktima apan gibaharan nga kung magsaba patyon.

Walay nahimo ang biktima dihang nakuha gyod sa suspek ang tinguha niini.

Daw makatulo ka higayon gihimo sa suspek ang pagpanglugos ngadto kaniya.

Tungod kay wala naagwanta sa biktima ang kasakit nga gibati ug kalagot sa iyang bayaw, gitug-an kini sa biktima sa mismong igsuon, hinungdan nga deretso silang nagpatabang sa Talakag Police Station.

Gitambagan ang biktima nga magpa-medical check-up una sa NMMC ning siyudad.

Desidido ang biktima nga pasakaan og kaso ang bayaw.