POSITIBO nga gitudlo sa saksi ang usa ka lider sa Batang Mindanao 29 (BM-29) nga responsable pagpusil patay sa kolektor sa lending firm niadtong niaging adlaw sa Corona Drive, Tibasak, Macasandig, siyudad sa Cagayan de Oro.
Una na nga nasikop sa kapolisan sa Macasandig Police Station si Ronald G. Edrote, 33, minyo ug ang pag-umangkon niini mao si nga si Giovanni Nafarete, 20, minyo nga pulos taga Sitio Biasong, Barangay Macasandig ning siyudad.
Samtang sa gihimo nga pagsunod sa kapolisan sa kaso, nasikop usab ang usa ka Nathaniel Bacarro, 27, minyo, taga Tagauanao, Indahag ning siyudad, ug gitumbok nga maoy nagmaneho sa motorsiklo nga gisakyan ni Edrote pagpusil kang Junres Matin-aw.
Nakuha gikan sa posisyon ni Bacarro ang usa ka kalibre .38 nga adunay buhi nga bala ug usa ka bolo.
Matud pa ni Police Senior Inspector Ariel Philiip Pontillas sa Sun.Sar Superbalita nga positibo gayud nga gitumbok si Edrote nga mao ang nagluthang sa biktima samtang si Bacarro posible usab nga mahimong saksi batok kay Edrote.
Samtang si Nafarete giingon nga ila una kini nga gipagawas ug ila lamang kini nga gisikop kagahapong adlawa kay lage nahisgutan man kini ni Edrote apan padayon pa usab kini nga imbestigahan.
Karong panahona, nagtingkagol sa mini-cell sa PS9 ang duha ka suspetsado alang sa posible nga kasong ipahamtang batok.