USA ka motorela driver ang gipanginlan nga responsable sa kamatayon sa sikyu niadtong Domingo mga alas 9:00 sa gabii sa Zone 12, Upper Carmen ning siyudad sa Cagayan de Oro.
Si Silvestre Grape Jr., 36, minyo ug nanimuyo usab sa maong dapit gipanginlan nga maoy responsable sa kamatayon Saldino Lalag, 47, usa ka sikyu.
Sa inisyal nga imbestigasyon sa maong hitabo, nasayran nga unang nakapunggit og usa ka babaye si Grape samtang nagmaneho og motorela.
Gibutyag ni Grape sa Sun.Star Superbalita nga iyang gidala sa JR Borja Hospital ang maong babaye arong patambalan diin nagkita ang babaye ug Lalag sa hospital kinsa nasayran nga managsilingan ang duha.
Samtang nagpatambal ang biktimang babaye buot mopauli ni Grape sa ilang balay aron magkuha og kwarta nga ibayad sa hospital kinsa giubanan ni Lalag sa kabalaka nga mosibat kini ug layasan ang iyang responsibilidad.
Pag-abot sa ilang balay, nagpabilin si Lalag sa motor samtang si Grape niadto sa iyang igsuon aron magkuha og kwarta.
Nakita na lang sa bayaw ni Grape si Lalag nga nagbuy-od duol sa motorsiklo ug gani dali pa kini nga nagpahibalo ngadto sa pamilya sa biktima sa nahitabo diin nagtuo kini nga adunay sakit nga patol ang biktima kay lage kalit lang kini nga natumba ug nagkirig-kirig.
Matud usab ni Lita, igsuon sa biktima nga wala gayud sa ilang pamilya ang maong sakit ug sukad wala gipatol ang iyang magulang hinungdan nga nagtuo kini nga gidagmalan ang biktima.
Gidugang pa nga aduna kini nakitang samad sa ulo tungod sa dugo diin gituohang gibunalan.
Gisaysay usab ni PO3 Paul Naces sa PS4 sa Carmen sa pakighinabi sa Sun.Star Superbalita nga padayon pa kini sila sa makuting imbestigasiyon ug nagpaabot pa sa resulta sa otopsiya sa patay nga lawas sa biktima.
Human sa maong panghitabo ang patay nga lawas sa biktima ang anaa na sa Bollozos Funeral Homes sa Bulua alang sa ipahigayong medico-legal aron masuta ang tinuod nga hinungdan sa kamatayon niini.
Samtang ang suspek ang anaa sa kustodiya sa kapolisan sa PS4 human boluntaryong mitahan ngadto sa ilang buhatan.