Satellite registration nagpadayon sa mga barangay

SA KASAMTANGAN, mokabat sa 19 ka libo ka mga botante ang wala pa nakapa-validate kon napaubos sa biometrics sa Cagayan de Oro City Commission on Elections (Comelec).

Kini ang gibutyag ni City Comelec Officer-in-charge Leilani Nace ug miawhag sa katawhan nga dili na maghulat sa Oktubre 31 ning tuiga.

Gibutyag ni Nace nga aduna silay satellite registration sa mga kabarangayan ug kini ang ika duha nga round.

Sa ikaduhang hugna, labina kay hapit na ang bulan sa Oktubre, gipili na nila ang mga barangay diin ubay-ubay pa ang wala nakaparehistro.

Matud ni Nace nga bisan pa og moubos sa 10 ka libo ang wala pay biometrics, dili sila makaakomodar niini kung didto na magparehistro sa katapusan nga adlaw sa Oktubre.

Ilang giklaro nga dili maka botar ang usa ka botante bisan paman aktibo kining nakabotar niaging eleksyon kung wala makapahulagway, maka finger-print ug pirma sa digital nga gimando sa Comelec. (SVB)