Babae nga gi-isolate sa NMMC nag-negatibo sa Mers-Cov

GIINGONG nagnegatibo ang usa ka pasyente nga babae kinsa gi-isolate sa Northern Mindanao Medical Center (NMMC) ug naubos sa imbestigasyon human unang gisuspetsahan nga nataptan og Mers-Cov kon Middle East Respiratory Syndrome Coronavirus.

Ang Department of Health (DOH) sa Northern Mindanao nipahibalo niadtong Sabado nga nadawat na nila ang resulta sa sample gikan sa maong babae nga gipadala didto sa National Reference Laboratory o Research Institute for Tropical Medicine (RITM) sa Alabang, Muntinlupa City, ug nagnegatibo kini sa Mers-Cov.

Gipasabot nga aduna lamang gihambin sa sakit sa baga ang biktima.

Kahinumduman, gibutyag ni Dr. Peter Quiaiot, kinsa tigpamaba ug officer-in-charge sa NMMC, nga padayonon nila ang pagtambal sa biktima ug ilang ipasalig nga mauli kini sa gihambin.

Una na nga migawas sa X-ray sa pasyente nga adunay pulmonary tubercolusis ang biktima. Niadtong Huwebes una na usab nga miklaro ang DOH nga dili Mers-Cov ang gihambin sa biktima.

Kahinumduman, naukay ang katawhan sa siyudad human una kining gisuspetsahan nga nataptan sa Mers-Cov tungod sa sintomas nga nabati niini nga susama sa maong virus. Gawas pa nga ang maong biktima gikan sa laing nasod. (SVB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph