PADAYON pa nga giobserbahan sa mga mananambal sulod sa balay tambalanan ang lalaki kinsa wala pa maila human giingong nabangga ang gimanehong motorsiklo niadtong Martes mga alas 11: 20 sa gabii sa Baloy, Tablon, siyudad sa Cagayan de Oro.
Ang biktima gibana-banang adunay gitas-on nga 5’4”, adunay paso sa tiil ug patik sa wala nga tiil ug nakasul-ob og T-shirt nga stripe nga blue ug puti.
Subay pa sa impormasiyon gikan sa Northern Mindanao Medical Center (NMMC) ning siyudad, diin gidala ang biktima, nasayran nga nalabyan lamang kini sa ambulansiya sa Malaybalay Medical Service ug gihatod sa maong ospital.
Gitoohan nga nabangga ang gimaneho niini nga motorsiklo sa prime mover, hinungdan sa maong aksidente.
Nakaangkon ang wala pa maila nga biktima og dakong gisi sa iyang agtang ug aping hinungdan nga anaa kini sa kritikal nga kahimtang.
Sa pagsulat niini nga balita, ang maong biktima ang pabilin pa nga wala maila ug padayon pa nga giobserbahan sa mga mananambal. (KCS)