MOKABAT sa 6,440 ka mga vote-counting machines (VCMs) ang moabot karong adlawa sa Davao City aron maoy gamiton sa Mayo 9 nga eleksyon.
"Naa ta'y mo-secure ana nga mga pulis, usa ka VCM naay military escorts," sulti ni Davao City Police Office spokesperson Chief Inspector Milgrace C. Driz.
Bisan ang mga dapit sa Paquibato District ug Marilog District nga di masulod og sakyanan naa say mga pulis ug militar nga naka-escort sa mga taga Commission on Elections (Comelec).
"Dunay mga area nga kabayo lang gyud ang magamit isip transportation, so naa gihapoy mo-secure sa mga opisyal sa Comelec," dugang ni Driz.
Sa Paquibato District, ang mga dapit nga di masulod og sakyanan mao ang Butay, Lobo, Tapak, Salapawan ug Kiman-anao samtang ang sa Marilog area mao ang Patag, Mabuhay, Gumitan, Sumilop Prim, New Subang, Malikongkong, Upian, Malamba Tagaibo, Pegalungan.
Gikan sa pagtugpa niini sa Francisco Bangoy International Airport, sugaton kini sa mga official transport courier sa Comelec ug i-diretso sa City Treasurer's Office (CTO) sa Sangguniang Panlungsod (SP) building dayon sugaton sa pipila ka mga board of election inspectors (BEIs).
Ugmang adlawa sab, dunay VCM testing nga ipahigayon ang Comelec una kini ipanghatod sa mga polling precincts sa Davao City.