ILIGAN CITY - Sikop sa mga operatiba sa Iligan City Police Office (ICPO) ang magtiayon nga taga-Marawi City atol sa gipahigayong drug bust operation niadtong niaging adlaw sa corner Burgos ug De Leon Street, Poblacion, ning dakbayan.
Ang bana naila nga si Amel Salic Azis, 35 anyos, samtang ang asawa si Noraina Manabilang Ampuan, 34, mga lumulupyo sa Sarimanok St., Poblacion, Marawi City.
Gawas sa usa ka sachet nga napalit sa asset sa kapulisan, nakuha usab gikan sa magtiayon ang 17 ka mga dagkung pakete sa gitouhang "shabu", onse mil pesos nga cash ug 14 ka mga alahas nga gold nga gilangkuban sa duha ka bangles, upat ka kwentas ug walo ka mga singsing.
Matud pa ni Chief Superintendent Leony Roy G. Ga, officer-in-charge sa ICPO, dugay na nila'ng gi-surviellance ang maong magtiayon kinsa nagdala pa sa ilang tulo ka mga gagmay'ng anak dihang nasikop kini sa kapulisan.
"Modus niya nga magdala og pamilya aron dilg mahalata," miingon si Ga.
Sa Iligan City ang 'distribution area' sa magtiayon. Mokabat sa P180,000 ang gibana-bana nga 'street value' o kantidad sa maong mga "shabu".
Sa pagsulat ning balita, naka-detain ang mga suspek sa selda sa Iligan City Police Station 4 samtang gihikay ang mga kaso mga ipasaka batok kanila. Ang ilang mga gagmay'ng bata gikuha na sa pamilya niini pauli ngadto sa Marawi City.
Nahimo ang malampusong operasyon pinaagi sa hiniusang pwersa sa City Intelligence Branch, sa Iligan City Public Safety Company (ICPS), sa City Anti-Illegal Drugs Task Force (CAIDTF), Police Station 1 ug Police Station
5.