NAKABSAN sa kinabuhi ang usa ka anak nga nagmaneho sa motorsiklo ug naangol ang inahan niini niadtong Sabado sa gabii sa lungsod sa Laguindingan, Misamis Oriental.
Patay sa insidente ang anak nga mao si Rodjemar Hampit, hingkod ang edad samtang samaran ang inahan nga angkas nga mao si si Margie, pulos residente sa lungsod sa El Salvador, Misamis Oriental.
Sa pasiunang imbestigasyon ni Senior Police Officer 1 Marlon Medriano sa Laguindingan Police Station gibutyag niini nga nabangga sa motorsiklo nga gimaneho ni Hampit ang usa ka de pasaherong bus nga gimaneho sab sa usa ka Lucio Laguras.
Ang mag-inahan pauli na unta niadtong tungora sa dakbayan sa El Salvador dihang miovertake kini sa usa ka truck ug samtang pasulod ang bus sa terminal sa Laguindingan kalit kining nabangga.
Gumikan sa kusog nga impact sa pagkabangga maayong pagkabunal sa ulo sa biktima ug maoy hinungdan sa iyang hinanaling kamatayon.
Ang inahan sa biktima daling gidala sa Northern Mindanao Medical Center (NMMC) ning dakbayan sa Cagayan de Oro kinsa padayon pa nga giobserbahan sa mga doktor.
Ang driver sa bus ang anaa karon gikostudya sa kapolisan sa Laguindingan kinsa gikatakda sab nga mag-atubang og kasong reckless imprudence resulting to homicide, physical injury and damage to property. (SVB)