NAKUHA sulod sa pribadong lawak ang mga pakete sa gituohang shabu ug drug paraphernalia sa gipahigayong Oplan Galugad niadtong Lunes, Septiyembre 26, alas 5 sa hapon sulod sa Misamis Oriental Provincial Jail (MOPJ) sa General A. Luna Street, dakbayan sa Cagayan de Oro.
Kini nasakmit gikan sa kobol-kobol ni Alvin Talagon, 43, minyo, taga Zone-6, Barangay Bugo ning dakbayan, kinsa napriso niadtong bulan sa Enero ning tuig.
Nagpahigayon og random Oplan Galugad ang tinugyanan sa MOPJ sa pagpangulo ni Jail Warden Dominador Tagarda ug inabagan sa kapolisan sa pagpangulo ni Police Senior Inspector Maricris Mulat, hepe sa Police Station 1 sa Divisoria.
Si Tagarda mibutyag nga grabe na ang ilang pagpaningkamot ilabi na usab sa kamandoan ni Gobernador Bambi Emano aron mamahimong drug free ang MOPJ apan aduna gihapon mga tawo nga nagmagahi nga magbag-o sa ilang kinabuhi bisan pa man sa mga programa nga gihatag kanila.
Gibutyag usab niini nga ang maong ilegal nga droga bantayunon kaayo gumikan kay bisan asa kini mamahimong ibutang ug kung dili magma-inabtikon ang mga tinugyanan sa MOPJ ilabi na mga guwardiya posible gayud nga malutsan.
Nakuha atol sa operasyon ang unom ka mga pakete sa gitoohang shabu, tulo ka mga disposable lighter, ug uban pa nga mga drug paraphernalia.
Sa pagkakaron, ang mga nakuhang ebidensya ang anaa na sa buhatan sa kapolisan ug giduso sa crime laboratory alang sa dugang pa nga mga eksaminasyon samtang nagpadayon ang kapolisan sa imbestigasyon kalabot na sa nakalusot nga mga ilegal nga droga sulod sa bilanggoan.