ILIGAN CITY - Samaran ang upat ka tawo human mibusikad ang usa ka granada nga gilabay sa wala mailang lalaki, alas 6:00 kapin ang takna sa gabii, Disyembre 7, sa Rizal Park (City Public Plaza) sa Barangay Poblacion, ning dakbayan.
Ang maong dapit atubangan mismo sa Iligan City Police Station 5, ang kanhi headquarters sa Iligan City Police Office (ICPO).
Naila ang mga biktima nga sila si Laureto Carabantes Alla Jr., 26 anyos, taga-Purok 5, Santiago; Cristine Perocho Mercaderos, 20, estudyante sa MSU-Iligan Institute of Technology, residente sa Sitio Curvada, Barangay Maria Cristina, Iligan City; Cherryl Matugas Paquit, 26, taga-Zone Caugmaran, Suarez; ug Shielamae Asibal Maagad, 23,
taga-Actub St., Poblacion, Iligan City kinsa pulos nakaangkon lamang og mga minor injury.
Sa inisyal nga imbestigasyon sa kapulisan, usa ka lalaki nga nag-bonnet og itom ug nag-jacket ang nakit-an sa mga bystanders nga mi-itsa sa maong granada.
Usa ka ginganlan og Edna ang miingon nga nakit-an niya ang maong lalaki nga midagan, agi atubangan sa police station ug sa Bureau of Fire Protection (BFP) building dayung sibat paingon sa may direksiyon sa Roosevelt, Barangay Poblacion.
Nakuha sa post blast investigation (PBI) team ang safety lever sa maong granada.
Miingon si ICPO Director Senior Superintendent Leony Roy Ga nga nagpadayon pa ang ilang follow-up investigation sa maong insidente hinungdan nga dili pa usab nila matumbok ang insakto nga motibo sa suspek.
"Pero atong gitan aw ang anggulo sa grudges o personal nga bikil ug ang kampanya sa ICPO batok sa illegal drugs nga mga possible motives," miingon si Ga.