Asset sa NBI gi-aresto | Sun.Star

Asset sa NBI gi-aresto

Time to read
1 minute
Read so far

Asset sa NBI gi-aresto

Wednesday, January 11, 2017

GIDALA na sa kapolisan sa Catarman Police Station ang usa ka asset human nasikop pinaagi sa warrant of arrest niadtong Martes, Enero 10, alas 3:20 sa hapon sa City Tourism Hall parking area ning dakbayan sa Cagayan de Oro.

Ang maong dinakpan naila nga si Ruel Salisi, 46, minyo, taga Poblacion, Catarman, Camiguin Province apan temporaryong nanimuyo dinhi sa dakbayan.

Si Salisi giingong asset sa National Bureau of Investigation (NBI).

Gibutyag usab ni Divisoria Police Station 1 Commander Maricris Mulat nga gi-angkon sa dinakpan nga asset siya sa NBI ug atol sa pagkasikop niini nagsul-ob pa kini og polo shirt nga adunay logo sa NBI.

“Mao na ako nga nahibaw-an sa iya, sa akong kauban kay mao man ang nag–interview sa iyaha, in fact kung makita nimo siya nagsul-ob pa ni siya og polo shirt nga black nga naay murag naka print nga murag sa NBI man siguro ni siya nga logo, pero dili pa pud ta ka confirmed og official ba gyud ni siya nga uniform sa NBI,” pahayag ni Mulat.

Nasayran nga nangayo og assistance ang kapolisan sa Catarman human nakadawat og taho nga nakita ang presensya sa suspetsado sa dapit.

Giingong ang maong warrant gi-isyu ni Honorable Judge Jeoffre Acebido, acting presiding judge sa Regional Trial Court-Northern Mindanao Judicial region, Branch 28, Mambajao, Camiguin sa kasong may kalambigitan sa Republic Act 7610 nga adunay bailbond nga P80 mil.

Samtang gibutyag ni Salisi nga andam niining atubangon ang kaso gumikan kay iya lang gipanalipdan ang iyang anak human gihilam sa menor de edad ang pribadong parte niini hinungdan nga iyang napasakitan.

Sa pagkakaron, ang maong dinakpan ang gidala na pagbalik sa Camiguin alang sa tukmang disposasyon.

Gipatik sa mantalaang Superbalita Cagayan de Oro Enero 12, 2017.

View Comments