Sundalo nga misuway pagpanglugos labihan ang pagbasol | Sun.Star

Sundalo nga misuway pagpanglugos labihan ang pagbasol

Time to read
1 minute
Read so far

Sundalo nga misuway pagpanglugos labihan ang pagbasol

Wednesday, January 11, 2017

LABIHAN ang hilak ug pangayo og pasaylo sa usa ka sundalo nga misuway og lugos sa 23-anyos nga dalaga sulod sa motel sa Barangay Kauswagan, dakbayan sa Cagayan de Oro.

Ang suspetsadong sundalo nga naa karon gikostudya sa Police Station 4 sa Carmen giilang si Clinton Dalid, lumad nga taga Agusan del Sur ug usa ka private first class sakop sa 4th Infantry Division.

Usa sa higala sa biktimang dalaga kinsa dili na magpaila sa iyang pangalan nga nahinabi sa SunStar SuperBalita nibutyag nga labihan gayud ang pangayo og pasaylo ni Dalid ngadto sa biktimang gitago sa pangalan nga Jane.

“Grabe niyang hilak ug sige siya sorry. Gusto lagi niya nga mapasaylo kay mawala daw tanan iyang pangandoy sa kinabuhi,” matod niini. Dugang niini nga daw gibasolan og maayo sa suspek iyang nahimo.

Apan ang 23-anyos desidido nga mopasaka og kasong abduction, attempted rape, ug physical injury sa gihimo niini kaniya.

“Dili man gud ko gusto nga basin naa pa siyay lain nga biktimahon. Nagtigom lang gyod ko sa akong kusog pero karon padayon gyod ang akong reklamo ani niya,” una na nga gibutyag sab ni Jane.

Si 4th Infantry Division spokesperson Joe Martinez miabiso sa biktima nga mopasaka sab og pormal nga reklamo ngadto sa ilang buhatan aron ilang mahikay ang kasong administratibo batok niini.

Dugang sab ni Martinez nga sa gihimo sa suspetsado dako ang purohan nga matangtang kini sa serbisyo.

Kahinumduman nga maayo na lamang nakalingkawas sa pagpanglugos gikan sa sundalong suspek ang usa ka babae human kini gidala sa usa ka inn sa Kauswagan.

Gisundan kining biktima nga gikan sa usa ka bar ug giingong tabangan sa pagpasaka og taxi apan miuban kini sa pagsakay ug gideretso sa Queensland ug didto bout himoun niini ang tinguha ug maayo na lamang nakatawag sa higala ug nakapangayo og tabang.

Gipatik sa mantalaang Superbalita Cagayan de Oro Enero 12, 2017.

View Comments