GIKUMPIRMA sa Civil Aviation Authority of the Philippines (Caap) ug tagdumala sa Laguindingan Airport nga andam kanunay ang airport alang sa international flights.
Kini ang gibutyag ni Manager Jose Bodiongan apan gibutyag niini nga dili kini deretsong mapatuman gumikan kay aduna pay mga rekisitos nga kinahanglan kumpletuhon.
Kon ang kapasidad sa airport maoy hisgotan daw ang andam kanunay ang Laguindingan gumikan kay pwede kaayong mobiyahe ang eroplano og 24 oras.
Usa sa gihungihong nga international flights mao ang biyahe paingon sa Singapore ug Hong Kong.
Gani aduna nay mga request nga gakadawat ang Caap gikan sa mga kompanya kalabot sa hangyo nga masugdan na ang biyahe alang sa laing nasod.
“Walay problema atong airport kay bukas kini 24/7 apan dili kini basta-basta madali,” butyag niini.
Hinuon gibutyag sab niini nga dakong kalamboan kini sa Misamis Oriental kung dili madugay mapatuman gyod sa hingpit ang mga international flights sa maong airport. (SVB)