NIDANGOP sa kapolisan ang usa ka babaye human gibanggaan sa kanhi hinigugma ug kaipon niadtong Huwebes, Pebrero 2, alas 8:20 sa gabii diha sa Tiano o Hayes Street, dakbayan sa Cagayan de Oro.
Ang biktima naila nga si Lita (dili tinuod nga ngalan), 35, dalaga, taga Barangay Patag ning dakbayan samtang ang kanhi kaipon nailang si Harold (bansagon gitago), 35, ulitawo ug kasamtangang stay-in sa usa ka pampublikong ospital nga nahimutang sa Capitol road sa susamang dakbayan.
Sa impormasyon nga nahipos gikan sa Police Station 1 sa Divisoria gikabutyag nga samtang anaa sa maong dapit ang biktima kalit lang gi-harass sa kanhi kaipon ug gibira ug naligsan pa kini sa motorsiklo nga gimaneho sa maong kanhi ka live-in.
Samtang sa bahin usab sa maong lalaki giingong buot niini nga kuhaon ang cellular phone nga gihulam sa kanhi kaipon niadtong bulan sa Disyembre tuig 2016 apan dili ihatag hinungdan sa maong hitabo ug gani gipatala usab kini sa buhatan sa kapolisan.
Nasayran nga wala na magkasinabot ang duruha hinungdan sa ilang panagbulag ug misangpot sa maong panagbinawi-ay ug mga panag-away.
Nakaangkon ang biktima og nagkadaiyang bun-og lakip na mga pangus sa kalawasan hinungdan nga nidangop kini sa kapolisan.
Ang maong insidente ang nakatala na sa buhatan sa Police Station 1 sa Divisoria ug giduso na sa tinugyanan sa Women and Children Protection Desk.