19 ka barangay ‘drug-cleared’ human sa tokhang | SunStar

19 ka barangay ‘drug-cleared’ human sa tokhang

Time to read
1 minute
Read so far

19 ka barangay ‘drug-cleared’ human sa tokhang

Thursday, February 16, 2017

ILIGAN CITY - Adunay 19 sa 44 ka mga barangay ning dakbayan ang gideklara'ng drug-cleared sa Iligan City Police Office (ICPO) human temporaryo'ng gipahunong ang Philippine National Police (PNP) sa ilang Oplan Tokhang tungod sa pagkalambigit sa pipila ka mga sakop sa organisasyon sa mga ilegal nga buhat.

Sa datos nga gihatag sa Police Community Relation Unit (PCRU) sa ICPO, kini gilangkuban sa San Miguel ug Sto. Rosario nga ilawom sa Iligan City Police Station 1; Upper Tominobo sa Police Station 2; Dulag, Kalilangan, Lanipao, Panoroganan, Kabacsanan, Hindang, Bonbonon, Rogongon, Mainit, Kiwalan, Dalipuga, Bunawan, Sta. Filomena, San Roque ug Digkilaan sa Police Station 3; ug Villa Verde sa Police Station 5.

Wala pa maka-sumiter ang Police Station 4 sa ilang report kabahin niini.

Ang report nga nakuha sa SunStar SuperBalita hangtud kini Pebrero 13.

Matud ni Chief Inspector Jovanne Cabusas, hepe sa PCRU-ICPO, nga ilang gihimong basehan o baseline sa ilang evaluation ang report sa Philippine Drugs Enforcement Agency (PDEA) nga as of June 2016, siyam lang sa 44 ka mga barangay ang “unaffected” o wala maapektuhan sa droga, 39 ang “drug-affected” o apektado.

“The 19 barangays are certified drug-cleared by the respective chiefs of police and attested by Barangay Anti-Drug Abuse Council. Pero dunay certain period nga atong ihatag sa mga barangay. Kung makit-an nga duna napuy presensiya sa mga drug personalities sa dapit, mawala sila sa listahan sa mga drug-cleared barangays ug balik napud sa sinugdanan sa mga lihok aron pagsugpo niini,” miingon si Cabusas.

Una na'ng gimando ni PNP Chief General Ronald Dela Rosa ang temporaryo'ng pag-undang sa kapolisan sa ilang mga drug bust ug ang pag-apply og search warrant nga dunay kalabutan sa droga.

Apan padayon sila nga motabang sa mga operasyon sa PDEA kon gikinahanglan.

Sa pagkakaron, nagpadayon ang asembliya sa mga kapitan kauban si Mayor Celso Regencia.

Nag-una sa ilang gihisgutan mao ang mga paningkamot sa kagamhanang lokal aron hingpit nga masumpo ang mga kalihukan sa ginadiling droga dinhi sa Iligan.

Gipatik sa mantalaang Superbalita Cagayan de Oro Pebrero 17, 2017.

View Comments