GIKAN sa pila ka adlaw nga haya sa dakbayan sa Cagayan de Oro gihatod na niadtong Miyerkules, Marso 22, ang patay ng lawas ni kanhi Department of Tourism Regional Director Catalino Chan ngadto sa iyang yutang natawhan sa Barangay Agoho, Mambajao, probinsya sa Camiguin.
Didto sa Cebu City nakabsan sa kinabuhi ang director tungod kay giatake sa kasing-kasing nga maoy hinungdan sa iyang kamatayon.
Nagsilbi kining Regional Director sa Department of Tourism-Central Visayas sa Cebu City sulod sa duha ka bulan gikan niadtong Enero 2017 human sa halos 11 ka tuig nga pagserbisyo niini sa Northern Mindanao.
Gibutyag ni Nicole Managbanag, kinsa information officer sa kagamhanan sa probinsya, nga inisyatiba sa kagamhanan sa Misamis Oriental nga mahatod sa iyang yutang natawhan si Chan ug giabaga sa kagamhanan ang tanan nga mga panginahanglanon mahatod lamang kini nga walay kakulian.
Matud ni Managbanag nga mapasalamaton kaayo si Gobernador Yevgeny Emano ni Chan gumikan sa kataas nga panahon nga iyang pagsilbi sa rehiyon labihan ang gihimo niining pagpaila sa turismo sa rehiyon labina gayod sa mga turismo sa Misamis Oriental nga karon naila na og maayo. (SVB)