SUKAD mibalik ang operasyon sa Oplan Double Barrel ang buhatan sa Police Regional Office-Northern Mindanao nakasakmit na og mobalor P3.3 milyon nga illegal nga droga.
Mibalik ang operasyon sa kapolisan niadtong Marso 4, ning tuig ug mokabat sa 670.28193 ka gramo sa methamphetamine hydrochloride o shabu ang nasakmit ug kini mobalor tanan og P3,322,467.74 sulod sa 18 ka adlaw nga operasyon.
Lakip pa sa listahan ang uwahing nadakpan nga usa sa high value target nga giilang si Nobaisa Tanggo sa Villa Candida, Bulua, Cagayan de Oro City niadtong March 19.
Moabot sab sa 312 ka mga drug personalities ang naaresto diin 281 ang drug pushers ug 31 ang drug users.
Kasupakan sa Republic Act 9165 ang gipasaka na sa korte batok sa mga dinakpan.
Tungod sa maong operasyon gikalipay ni Police Chief Superintendent Agripino Javier ang paspas nga mga kalamposan sa operasyon sa kapolisan. (SVB)