NASAPON nga nag-pot session ang tulo ka mga tawo diin usa niini trabahante sa City Hall atol na usab sa malampusong buy-bust operation diha sa Burgos/Kalambagohan Streets, Barangay 15 ning siyudad sa Cagayan de Oro.
Nasikop sa drug bust si Rocelio Pabilan Plaza, 33, usa ka taxi driver, residente sa nahisgutang dapit samtang naatolan usab sa akto ang laing tulo ka mga suspek nga nag-pot session kinsa nailang sila si Jem Babael Bombeo, 29, ulitawo ug empleyado sa City hall kinsa naka-assign sa General Services; Cheryl Diaz Abarquez, 28, dalaga nga taga Xavier Eco-Ville, Barangay Lumbia ug Jennieca Panis Alcantara, 30, dalaga nga taga Barangay Puntod ning siyudad.
Sa nahipos nga impormasiyon gikan sa Police Station 1 (PS1) sa Divisoria gikabutyag nga nagpahigayon ang kapolisan sa pagpangulo na usab ni P/SrInsp. Maricris Mulat, og drug buy-bust operation hinungdan nga malampuson nila nga nasikop ang target sa maong operasiyon lakip na ang laing tulo human nasapon gayud nga nagpahigayon og pot-session.
Gibutyag sa kapolisan nga dugay na nga ilang gipanid-an ang suspek tungod kay anaa kini sa ilang watchlist.
Napalitan og pakete sa gitoohang shabu ang suspek gamit ang drug bust money nga P200 ug nakuha usab sa posisyon sa mga suspek ang drug paraphernalia.
Mokabat ngadto sa 1.1010 gramo sa shabu ang nakumpiskang mga ebedensiya atol sa operasiyon nga gibanabana usab nga adunay kantidad nga P6,606.
Sa pagsulat niini nga balita ang maong mga dinakpan ang nagtingkagol na sa Maharlika Detention Cell alang sa pag-atubang sa tukmang kaso batok sa mga dinakpan.