DILI pa makumpirma sa kapolisan kon unsa ang motibo sa tulo ka mga suspetsado nga nakuhaan og granada, armas, electrical wires ug uban pa niadtong Dominggo, Marso 26, diha sa usa ka motel sa Barangay Kauswagan, dakbayan sa Cagayan de Oro.
Ang mga suspetsado naila nga sila si Oding Magompara Alamada, 35, minyo, lumad nga taga Barangay Lilod, Marawi City, Lanao del Sur; Sidic Oraco Casubidan, 36, taga Bangolo, Marawi City; ug Bittyara Sainodin Solaiman, 38, minyo, taga Marawi.
Gibutyag ni Cagayan de Oro City Police Office spokesperson Mardy Hortillosa nga gipalawoman pa nila ang imbestigasiyon batok sa mga suspetsado ug dili pa nila makumpirma ang mga pagduda kung miyembro kini sa Maute group aron na usab nga dili kini sila masayop sa paghatag og impormasiyon.
“Atoa pa kanang gi-imbestigahan og maayo kay para at least dili ta makahatag og sayop nga impormasiyon, ato pa kana silang imbestigahan kung unsa ilang mga trabaho ug mga kaagi aning mga tawhana ug sa ilang pamilya, kana usa na sa atong ginatan-aw pero dili pa mi makapagawas ana hangtod nga wala pa’y validated information nga kanang ma- link sa ilaha kung miyembro ba gyud sila o dili,” pahayag ni Hortillosa.
Sa pagkakaron, gitan-aw pa sa kapolisan kon asa konektado o sila ra ba gayud nga mga grupoha ang maong mga dinakpan.