KAPIN usa ka milyon nga kantidad sa gituohang shabu ang nasakmit gikan sa gituohang drug lord atol gihimong operasyon sa kapolisan niadtong Biyernes sa Katipunan, Villanueva , Misamis Oriental.
Nasikop sa mga sakop sa Cagayan de Oro City Police Office (Cocpo), City Intelligence Unit (CIU) ug Villanueva Police ang giingong High valued target nga nailang si Jade Rocero, residente sa Barangay Bugo ning siyudad sa Cagayan de Oro.
Nakuha gikan kang Rocero 21 ka pakete sa shabu nga mokabat sa P1.3 milyon nga kantidad ug kalibre 45 nga armas ug buhing bala.
Subay sa kapolisan nga ang maong suspek ang nag-supply sa ginadiling druga dinhi sa siyudad sa Cagayan de Oro ug sa ubang mga dapit sa Misamis Oriental.
Gibutyag ni Police Chief Inspector Ariel Philip Pontillas, head sa CIU – Cagayan de Oro Drug Enforcement Unit, nga giingong adunay nagprotektar nga mga inilang personahe dinhi sa siyudad kang Rocero hinungdan nga taod-taod kini ayha nadakpan.
“Gabagsak siya og druga sa mga Munisipyo sa CdeO and alledgedly naa ga-protect sa iya nga mga personalities that is why dili siya gakadakpan,” pahayag ni Pontillas sa SunStar CdeO.
“Usa kini ka drug lord sa Bugo, Bugo kani siya nga area pero since nga kugi kaayo ang atong hepe sa Bugo nidagan kani siya sa Villanueva,” dugang pa niini sa interbyu sa radyo.
Nasayran nga misulay pa sa pagbunot sa armas ang suspek apan na-unhan kini sa kapolisan og warning shot ug dali ra usab nga mitahan ang maong suspetsado.
Sa pagkakaron ang maong suspek ang mag-atubang sa kasong may kalambigitan sa ilegal nga druga.