Mga bakwit diha sa kapitolyo gikatakdang mopauli na

NAGHINAM-HINAM na nga mopauli sa ilang tagsa-tagsa ka puloy-anan ang mokabat 87 ka pamilya nga namakwit gikan sa Sitio Camansi sa lungsod sa Lagonglong Misamis Oriental paingon diha sa Capitol Ground, Velez St. ning dakbayan sa Cagayan de Oro.

Kahinumduman nga mibakwit sila niaging mga semana gumikan dili sila komportable sa presensya sa mga sundalo sa ilang dapit tungod kay daw gahatag kini og kahadlok kanila.

Ilang gibutyag nga kinahanglan na nilang manguli kung matuman ang ilang gihangyo gumikan kay mogradwar ang mokabat 11 nila ka mga sakop.

Matud ni Nicole Managbanag kinsa Misamis Oriental Provincial Information Officer nga gihulat pa sa kagamhanan sa probinsya ang resulta sa fact-finding team nga gilangkoban sa Higalang Lumad, representante gikan sa National Commission on Indigenous People kon NCIP ug personahe sa Provincial Disaster Risk Reduction and Management Department (PDRRMD) ang area sa Sitio Camanse aron masuta kung luwas na ba ang mga residente nga mobalik sa ilang puloy-anan ug wala na bay presensya sa mga sundalo ug ingon man walhong pundok nga maoy hinungdan gakahitabo ang engkwentro nga ikahadlok og maayo sa mga bakwit.

“Kung unsa man gani ang resulta sa ilang pagsusi sa dapit posibleng sa makabalik na ang mga bakwit ugma ug sa ilang pag-uli makadala sila og mga nag-unang panginahanlan nila sama sa bugas, de lata ug uban pa nga ayuda nga ihatag ni Gobernor Bambi Emano,” butyag niini.

Gawas niini aduna pay gihangyo ang mga bakwit nga unta dili magtambay sa ilang lugar ang mga sundalo kay naghatag kini og kahadlok kanila.

Gihangyo nila ang mga sundalo nga mopirma sa kasabutan aron daw dili na mobalik sa ilang lugar.

Una na nga gibutyag ni Captain Joe Patrick Martinez, kinsa tigpamaba sa 4th Infantry Division Philippine Army, nga dili nila kini matuman gumikan kay kung adunay presensya sa walhong pundok sa lugar ila gyod kining adtoan aron luwas ang mga residente sa himoung mga pagpanghasi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph