Bata gisagpa-sagpa sa amahan | SunStar

Bata gisagpa-sagpa sa amahan

Time to read
1 minute
Read so far

Bata gisagpa-sagpa sa amahan

Thursday, April 20, 2017

NILAGOM ug nilakra pamang mga kamot sa nawong sa kapin usa ka tuig nga bata ug nagdugo ang baba human kini gisagpa-sagpa sa kaugalingong amahan niadtong Huwebes sa buntag, Abril 20, sa Burgos Street ning dakbayan sa Cagayan de Oro.

Naghilak nga midangop sa Police Station 1 sa Divisoria ang inahan sa bata nga si Lyn (dili tinuod nga ngalan), 19, aron ireklamo ang gihimo sa amahan sa bata.

Sa pakighinabi sa SunStar SuperBalita ngadto kang Lyn gibutyag niini nga nasuko ang iyang kaipon nga amahan sa bata tungod kay nagsige kini og hilak sayo pa sa buntag.

Mao na lang ang nakita ni Lyn nga pula na kaayo ang nawong sa bata ug nagdugo na ang baba ug ang mata niini.

“Masuko siya og maghilak iyang mga anak labi na gyud ni, dili lang ni kaduha, katulo karon nagrabehan na gyud niya, pag-abot nako sa taas pula naman dayon kaayo ang nawong pagkuha dayon nako nagdugo na iyang baba ug luha sa mata,” tipik sa pahayag sa biktima.

Gani gibutyag pa niini nga taod-taod na niini nga gi-antos ang pagpasakit kaniya lakip na sa anak kinsa gihulga pa nga patyon apan gi-antos lang aron lamang nga dili mawad-an ang mga anak og amahan.

“Malooy ka sa imong anak, ana siya nganong malooy man ko ana patyon ko hinuon na karon,” dugang pahayag sa inahan sa bata.

Giingong seloso kaayo kining iyang kaipon ug bisan kinsa na lamang ang dudahan hinungdan na usab nga grabe ang kasuko niini ilabi na sa maong bata nga gi-akusahan nga dili siya ang amahan.

Gidugang pa nga dili lamang kini ang unang higayon nga gipasakitan niini ang maong bata gani gisagpa na usab kini og kutsara kaniadto.

Sa pagkakaron, nakatala ug giduso na sa buhatan sa Women and Children Protection Desk ang maong insidente alang sa tukmang disposasiyon.

Samtang ang suspek kinsa pursigedo gayud nga pasakaan og kaso ni Lyn ang wala sa ilang panimalay atol sa pagresponde sa kapolisan.

Gipatik sa mantalaang Superbalita Cagayan de Oro Abril 21, 2017.

View Comments