GIPAHIBALO karon sa kagamhanan sa probinsya sa Misamis Oriental nga adunay 147 ka mga slot sa mamahimong Iskolar Ko Ni Bambi (IKNB) ang bakante pa niining panahona.
Kini ang gibutyag ni Mitchellyn Yrat, Information Officer sa IKNB ug miingon nga pahimuslan ang higayon tungod kay kutob lamang kini ning bulan sa Mayo.
Sa dakbayan sa Gingoog adunay 21 ka bakante, El Salvador City, 16, Alubijid, 15, Tagoloan ug Villanueva, 15, Opol, 13, Talisayan, 13, Salay, 13, Claveria, 11, Laguindingan, 11, Lagonglong, 8, Kinoguitan, 6, Balingoan, 4 ug Magsaysay, 1.
Nasayran sab gikan niini nga ang mga moabot na ngadto sa 3,088 ka mga benipisaryo sa Iskolar Ko Ni Bambi sa school year 2016 to 2017.
Gipasabot sab niini nga kini nga mga iskolar nagikan sa lisod nga pamilya apan naningkamot ug haom kaayong mahimong iskolar gikan sa 23 ka mga lungsod.
Matag usa kanila adunay pinansyal nga madawat P2500 matag semester agi og abag sa ilang kurso nga gikuha.
Wala usab gipangayo nga grado ang probinsya ug importante lamang nga mapadayon sa pagtoun. (SVB)