MANTICAO, Misamis Oriental -- Gi-awhag ni Erna Oco, principal sa Manticao Central School, ang mga ginikanan nga ipa-eskwela deretso ang ilang mga bata sa pagsugod sa klase sa Hunyo 5, karong tuiga.
Sa pagbukas sa Brigada Eskwela niadtong Lunes, Mayo 15, gi-awhag ni Oco ang mga ginikanan nga wad-on na ang batasan kaniadto nga dili magpa-eskwela sa ilang mga bata sa unang semana sa pagsugod sa klase.
"Kaniadto, dili pa ipa-eskwela sa mga ginikanan ang ilang mga anak sa first one week sa klase kay manglimpyo raman gihapon. Karon, kung one week after the classes started pa ipa-eskwela ang inyong mga anak, considered na sila nga absent," pasabot ni Oco sa mga ginikanan nga mitambong sa maong programa.
Ang Brigada Eskwela, matud pa sa nasangpit nga principal, programa sa Department of Education (DepEd) aron malimpyuhan ug ma-repair na'ng daan ang mga classroom samtang wala pa magsugod ang klase.
Ipahigayon niini ang pagpanglimpyo, pagpang-repair, pagpamintal ug pagpanglampas sa palibot sulod sa usa ka semana. Niini nga programa, gipang-awhag ang mga ginikanan, mga non-government organization, mga civic group sa pag-volunteer pagtabang sa maong kalihukan.
Niini usab nga panahon naandan na sa ubang mga ahensiya sa gobyerno sama sa Philippine Army, Philippine National Police, Bureau of Fire Protection ug uban pa, sa pagtabang sa Brigada Eskwela isip ilang kontribusyon sa komunidad.
"Ang Brigada Eskwela programa sa DepEd in preparation for the opening of classes, para pagsugod sa klase, dili na manglimpyo ang mga bata," dugang ni Oco.
Si Mayor Tony Baculio sa iyang mensahe midayeg sa kaaktibo sa mga ginikanan nga milambigit sa Brigada Eskwela.
"Ang ginikanan ang adunay dakung papel ug obligasyon sa pag-umol sa mga bata. Kinahanglan usab kamo motabang sa mga magtutudlo. Daku og tabang ang eskwelahan busa magtinabanby kita aron magmalampuson ang school year 2017-2018," miingon si Baculio.
Atol sa maong programa, gidawat usab sa tunghaan, pinaagi sa principal, ang mga donasyon nga pintal, ply board, mga dagkung basurahan, sinako nga semento, lawn mower ug uban pa'ng gamit sa pagpamanday gikan sa barangay council, sa kagamhanang lokal sa Manticao, sa probinsiyal nga kagamhanan sa Misamis Oriental ug uban pa'ng mga pribadong donor.