Gikan nagpamasahe namatay | SunStar

Gikan nagpamasahe namatay

Time to read
1 minute
Read so far

Gikan nagpamasahe namatay

Tuesday, May 16, 2017

NAPUNO og mga lagom ang lawas sa usa ka empleyado sa Department of Environment and Natural Resources (DENR) dihang nakabsan sa kinabuhi human nagpamasahe sa usa ka spa sa Velez/JR Borja Street, dakbayan sa Cagayan de Oro.

Patay na nga nahidangat sa pribadong balay tambalanan si Reynaldo Tubac, 47, minyo, taga Kolambog, Barangay Lapasan ning dakbayan.

Sa pakighinabi sa SunStar SuperBalita, gibutyag ni April, 22, anak sa biktima, nga nagtuo sila nga aduna gayuy nahitabo sulod sa Spa tungod kay normal nga mibiya ang ilang amahan ug gani naglaag pa kini sila sa usa ka mall ayha kini nagpamasahe.

“Murag naa gyud, Okay gyud kaayo siya normal gyud kaayo siya sa tanan kay nanlaag pa biya mi sa SM,” pahayag ni April.

“Mga 12:00 daw kapin sila nahuman og katong massage, pagkahuman sa massage kay ang kato daw babae nga masahesta nagtimpla daw siya’g salabat wala ko kabalo nganong nagtimpla siyag ing ato, pagkahuman kay nakasuot pa daw akong papa sa isa niya ka kamot sa sinina unya natumba na collapse na daw siya,” asoy ni April.

Gidugang pa sa asawa sa biktima nga niadtong semana santa nasulod sa Intensive Care Unit (ICU) ang iyang bana human usab kini nagpamasahe sa susama nga spa.

Gibutyag pa usab niini nga nagtoo sila nga aduna’y nahitabo kay lage normal man kini sa dihang ila pa nga kauban ug nganong napuno ang lawas niini sa mga lagom-lagom.

“Dead on arrival na daw kaganiha dinhi-a, cardiac arrest among gikatingalahan nganong lagom lagom iyang likod basin nasobrahan og hilot, wala man gyud mi kabalo nga didto diay siya sige pahilot," pahayag sa asawa sa interbyu sa radyo.

“Na-atake siya sa atong holy week diha gihapon siya sa spa gikan, nadala napud siya dinhi na ICU paman gale to,” dugang pa niini.

Samtang gibutyag usab sa kapolisan sa Divisoria Police Station nga ila gihapong imbestigahan ang maong patigayon ug ang mga empleyado niini gawas sa pagpaabot sa resulta sa otopsiya sa maong patay nga lawas.

“Maghulat sa mi sa result sa autopsy pero naa gihapoy atong himuon nga investigation sa mga empleyado didto kay didto man ni nahitabo,” pahayag ni Police Inspector Jessie Palencia, deputy station commander sa Police Station 1 sa pakighinabi sa SunStar SuperBalita.

Nasayran nga high blood pressure ang gihambing sa maong biktima kinsa usab aduna’y mga gimentenar nga mga tambal.

Sa pagkakaron, padayon pa ang kapolisan sa pag-imbestiga samtang nagpaabot sa resulta sa otopsiya sa Scene of the Crime Operatives aron masuta ang tinuod nga hinungdan sa kamatayon sa biktima.

Gipatik sa mantalaang Superbalita Cagayan de Oro Mayo 17, 2017.

View Comments