Mga armas, shabu nakuha gikan sa balay sa kapitan | SunStar

Mga armas, shabu nakuha gikan sa balay sa kapitan

Time to read
1 minute
Read so far

Mga armas, shabu nakuha gikan sa balay sa kapitan

Friday, May 19, 2017

POSITIBONG nakuhaan og mga armas lakip na ginadili nga droga ang usa ka barangay kapitan human gironda ang panimalay niini kagahapon sa buntag sa Cogon, Balingasag, Misamis Oriental.

Ang maong dinakpan naila nga si Robert Valmores, kasamtangang Kapitan sa Barangay Cogon ug giingong taud-taud na nga nalambigit sa ginadiling droga.

Sa impormasiyon nga nahipos nasayran nga nagpahigayon ang Philippine Drug Enforcement Agency (PDEA)-Northern Mindanao og operasyon dala ang search warrant hinungdan nga malampusong nakuhaan kini sa nagkadaiyang mga armas lakip na mga droga.

Gibutyag sa tinugyanan sa usa sa mga agent sa PDEA nga ang tuyo gayud sa maong search warrant mao aduna’y makitang mga droga sa maong panimalay ug nagpositibo kini hinungdan nga malampuson kining gisikop.

Nakuha gikan sa panimalay niini ang AK47, mga buhing bala, magnum .45 nga bala ug kalibre .45 nga armas nga puno usab sa buhing bala.

Samtang nakuhaan usab kini og duha ka sako sa shabu ug laing unom ka pakete sa illegal nga druga lakip na mga drug paraphernalia.

Gibana-banang mokabat ngadto sa kapin kon kulang nga P400 mil nga kantidad sa shabu ang nakuha sa maong balay sa kapitan sa maong dapit.

Pabilin usab nga wala’y giluwatang pahayag ug nagpakahilom ang suspetsado karong mga panahona kalabot na sa mga nakuhang mga ebedensiya sa panimalay niini.

Samtang gikompirma usab niini nga aduna pa’y nakitang mensahe sa cellular phone sa maong Kapitan nga ipabantay kini kay padulong na matud pa ang mga PDEA sa panimalay niini.

Sa pagkakaron, ang maong dinakpan ang anaa na sa mini-cell sa PDEA samtang lakip usab sa nasikop ang igsoon matud pa niini kinsa anaa sulod usab sa maong balay.

Gipatik sa mantalaang Superbalita Cagayan de Oro Mayo 19, 2017.

View Comments