SAPON sa drug bust ang usa ka kanhi sundalo niadtong niaging adlaw sa Barangay Kauswagan ning dakbayan sa Cagayan de Oro.
Giila ang dinakpan nga mao si kanhi Private First Class Andre Kim Realista, 26, bulag sa asawa ug kanhi sakop sa 4th Infantry Division Philippine Army.
Napalitan si Realista og mobalor P500 sa gitouhang shabu dihang usa ka sakop sa Police Station 4 ang nagpatoung buyer ug kostumer.
Positibong napalitan ang dinakpan ug nakuha gikan sa posisyon niini ang laing pakete sa gitouhang shabu ug uban illegal drug paraphernalia.
Ang suspek miangkon nga iyang kanhi asawa ang hinungdan nganong napugos niini nga trabaho tungod kay kinahanglan niya buhion iyang mga anak nga gibyaan niini labina gidala dala iyang ATM.
Giangkon sab niini nga nawad-an siya og paglaom dihang usa ka higayon miuli sa puloy-anan ug nakita nga adunay brief diin gituohan niining gipanag-iyahan sa laing lalaki.
Emosyonal nga giangkon niining naingon ani iyang kinabuhi tungod sa pagbulag nila sa asawa.
Samtang gibutyag ni Police Senior Inspector Mario Mantala Jr. deputy station commander sa Police Station 4 sa Carmen nga taod taod na nga gisubaybayan ang kalihokan niini hinungdan ilang gikasa ang operasyon.
Gikatakdang mag-atubang og kasong supak sa Dangerous Drugs Act ang suspetsado kinsa nagtingkagol na karon sa Maharlika Detention Cell.