DUGANG mga magtutudlo ang gikinahanglan karon sa mga tunghaan sa sekondarya sa Misamis Oriental.
Kini ang gibutyag ni School Division Superintendent Cherry Mae Limbaco nga nainterbyu sa SunStar SuperBalita kinsa nipasabot nga daghan sila og item teacher apan kulang sa qualified teachers alang sa sekondarya labina gayud niadtong major sa subject nga Filipino, Math, Mapeh, Aralin Panlipunan ug uban pa.
Daghan ang qualified teacher sa elementarya gumikan kay sagad sa mga unibersisad labina pampubliko ang kurso nga tanyag Bachelor of Elementary Education lamang. Usa sa nakitang rason sa kakulangon.
Gibutyag usab niini nga wala na sila naproblema sa elementarya tungod kay duna na silay bag-ong 151 ka mga magtutudlo alang niini.
Tungod niini nanawagan si Limbaco nga niadtong gustong mag-apply gikinahanglan nila og magtutudlo nga lumad nga Misamisnon tungod kay ila gihapon kining i-verify sa Commission on Election sa tinoud nga puloy-anan niini.
Nasayran nga mando ang localization kon gikinahanglan lumad sa lugar ang usa ka magtutudlo.
Ning panahona adunay 79 ka aplikante apan 29 lamang niini ang mipasar aron mahimong kwalipakidong magtutudlo.