GIANGKON sa New People’s Army (NPA) ang pagpangatake sa usa ka detachment sa 4th Infantry Division sa kasundalohan sa Impasug-ong, Bukidnon, niadtong Sabado, Mayo 27.
Gikan sa impormasyon nga gibutyag ni Ka Malem Mabini, tigpamaba sa NPA-North Central Mindanao Region Command, nga ang NPA-Mt. Kitanglad Sub-Regional Command (SRC), "malampusong gi-ambush" ang detachment sa kasundalohan sa Sitio Intabas, Barangay La Fortuna, sa maong munisipyo, kapin alas syete sa buntag.
Matud sa taho, nasakmit ang tulo ka tag-as og kalibreng mga armas nga gilangkuban sa isa ka M16, ug duha ka Garand ug unom ka military pack.
Gideklara sa NPA nga duna sila'y "casualty" nga duha nga gikan sa kasundalohan, ug luwas ang pwersa sa mga rebelde nga naka ikyas.
"Padayong gipaabot sa NPA-Regional Operations Command, North Central Mindanao Region ang kompletong detalye niini nga hitabo," sigun sa pamahayag sa NPA.
Samtang sa pagka karon, ginahulat pa nga mohatag og opisyal nga pamahayag ang kasundaluhan labi na sa 4ID.
Ang pagpangatake nahimutang tunga sa panawagan sa Communist Party of the Philippines (CPP), ang politkinhong partido sa NPA inubanan sa kaalyado niini nga National Democratic Front of the Philippines (NDFP), nga pakusgon ang opensiba isip tubag sa pagbutang ni Presidente Rodrigo Duterte sa Mindanao ubos sa Martial Law, isip usab lakang human sa pagpangatake sa teroristang grupo sa Maute sa dakbayan sa Marawi niadtong Mayo 23.
Sa mismong adlaw usab sa opensiba sa NPA, gideklara sa goberno sa Pilipinas pinaagi sa mga negotiators niini nga ang pagpadayon sa ika-lima nga session sa peace talks tali NDFP ngadto sa Netherlands.
Usa ka adlaw sa wala pa ang panghitabo sa Impasug-ong ug sa pagsuspinde sa peace talks, ang NDFP nagpahimangno pa unta sa kauban niining CPP-NPA nga hatag og rekonsiderasyon ang planong opensiba niini.