PULOS gihangyo ni Cagayan de Oro City Mayor Oscar Moreno ug Misamis Oriental Yevgeny Emano ang mga tunghaan sa dakbayan ug Misamis Oriental nga dawaton ang mga estudyanteng bakwit nga nagikan sa dakbayan sa Marawi.
Matud ni Mayor Moreno nga kinahanglan dawaton ang mga tinun-an tungod kay dili mahimo nga anaa lamang sila sa ilang puloy-anan labina dili tiaw ang epekto kanila sa kasinatian didto sa Marawi.
Gimando niini si City Social Welfare Development Chief Teddy Sabugaa nga kinahanglan usa moagi sa proseso ang mga bata kalabot sa ilang psychological aspect.
Aduna sab hangyo si Misamis Oriental Governor Bambi Emano ngadto sa mga tunghaan nga dawaton na diretso ang mga tinun-an nga namakwit.
Dili na kini kuti-kutihon sa pagpangayo sa mga rekisitos tungod kay nasayod nga ang mga butang nila ang nalimtan na atol sa ilang dili tiaw nga kasinatian atol sa giyera tali sundalo ug mga grupo sa Maute.
Dako ang pagtuo ni Emano nga kining mga bata ang kinahanglan dili balibaran sa pag-enrol ug makatoun.
Hinuon niaging semana atol sa pagtambong sa SuperBalita sa press conference sa pagbisita ni Department of Education Secretary Leonor Briones sa Cagayan de Oro, gimando niini sa tanan mga magtutudlo sa pampublikong tunghaan sa Mindanao ug bisan gawas nga bahin sa Mindanao nga dawaton ang tanan nga mga tinun-ang bakwit bisan walay form 137 card.
Hatagan usab sila og spesyal nga magtutudlo nga makasabot sa ilang mga pinulongan labina sagad sa apektado pulos man Muslim.
Dili usab tugotan ni Briones nga adunay ilain nga bata ug gusto niining isagol sila sa mga tinun-an aron mas molig-on ang relasyon tali Muslim ug Kristiyanos.