TALIWALA sa mga matag karon ug unya nga mga checkpoint ug ang pagpatuman sa kahapsay sa dakbayan sa Cagayan de Oro, ang kapolisan gikan sa City Police Office walay puas gihapon sa mga operasyon kontra droga.
Niadto lamang adlawng Sabado ug Domingo, Hunyo 10 ug 11, ubay-ubay ka mga operasyon ang gihimo sa kapolisan.
Unang drug bust sa Police Station sa Carmen pangulohan ni Police Chief Inspector Richie Salva diha sa Queensland Hotel, Barangay Kauswagan, ning dakbayan.
Nasikop ang suspek nga si Arnold Batal, 46, taga Indahag, ning dakbayan. Nakuhaan kini og gitouhang shabu nga mobalor ug P1,000 lakip ang uban illegal drug paraphernalia.
Sunod nga operasyon gihimo sa Police Station 8 sa Lumbia diin ang drug bust gihimo sa Zone 5 Barangay Bugo, ning dakbayan.
Nasikop ang usa ka Arturo Nanale, 40; ug Erwin Loveria, 29; pulos residente sa dapit ug nakuhaan og pito ka gagmayng pakete sa gitouhang shabu.
Samtang mikasa sab og operasyon ang Police Station 2 sa Cogon pangulohan ni Police Chief Inspector Mohammad Taufh Abduhalim diha sa Pabayo-Dolores St. Barangay 3, ning dakbayan nga miresulta sa pagkasikop ni Rickson Junayon, 25, taga Carmen ug Jamel Hadjinoor, taga Barra, Iponan.
Narekober ang usa ka pakete sa gitohang shabu mobalor og P200.00. Gisundan nila og laing operasyon sa Ramonal Village sa Barangay Camaman-an ning dakbayan.
Naaresto ang usa ka Augustin Capagngan, 52, residente sa dapit. Nakuha gikan sa posisyon niini ang duha ka pakete sa shabu nga mobalor og P400.
Uwahing operasyon gipahigayon sa City Drug Enforcement Unit diha sa Gusa ning dakbayan nga miresulta sa pagkasikop sa usa ka Elwin Barquez, sa Phase 1, Villa Ernesto Gusa.
Nakuhaan ang suspek ug usa sa ka pakete sa gitouhang shabu mobalor og P1,000.00
Ang mga dinakpan pulos nagtingkagol karon sa Maharlika Detention Cell diin gikatakdang mag-atubang og kasong supak sa Republic Act 9165 kon Dangerous Drugs Act.