ILIGAN CITY -- Patay ang upat ka gituohang mga sakop sa teroristang Maute human gibanhigan sa wala pa masutang grupo sa mga armado ang convoy sa Regional Public Safety Battalion sa Philippine National Police Regional Office Autonomous Region in Muslim Mindanao (RPSB-PNP-PRO-Armm), alas 7 kapin sa gabii, Hunyo 10, duol sa may Panta ug Balo-i, Lanao del Norte.
Sa report sa PNP Joint Task Group sa Joint Task Force Marawi nga paingon ang convoy ngadto sa Cagayan de Oro aron i-inquest sila si Zulkifli Risales Maute, Aliasgar Hadji Suluman, Salah Gasim Abbas ug Allan Capal Sulaiman.
Kauban ang upat sa inahan sa magsoo'ng Omar ug Abdullah Maute nga si Ominta Romato Maute alyas Farhana nga nadakpan sa kapolisan niadtong Hunyo 9 sa gabii didto sa Masiu, Lanao del Sur.
Naabtan sa mga sakop sa media ang mga sundalo nga nag-check point sa may Nangka, Balo-i. Wala gipalahos ang mga sakyanan, lakip ang mga gisakyan sa media nga pauli na unta sa Iligan tungod kay kinahanglan pa'ng mag-clearing sa dapit kung asa nahitabo ang pagpangambush.
"May narinig kaming putukan diyan sa baba kaya pina-secure sa'min dito at wala munang dumaan hanggang hindi magiging cleared ang area. May nakakita na dalawang naka-motorsiklo kanina diyan mga armado, pero ngayon lang sinabi sa atin," pamahayag sa usa ka sundalo sa may checkpoint.
Gitugutan ang mga motorista nga makaagi sa dapit human ang kapin usa ka oras pinaagi sa pag-escort sa duha ka tangke sa Philippine Marines.
Naabtan sa mga reporter ang RPSB-PRO-Armm sa Dr. Uy Hospital, ning dakbayan, aron patambalan ang mga samarang Maute apan miingon ang guwardiya sa tambalanan nga gideklarang dead on arrival ang tulo.
Nasayran sa SunStar SuperBalita nga gibalhin ang usa sa upat ngadto sa Gregorio Lluch Memorial Hospital apan namatay kini human ang usa ka oras.
Tulo ka mga sakop sa PNP ang samaran sa maong pagpamanhig nga nailang sila si Police Chief Inspector William Santos, Police Senior Inspector Jans Vladimir Hilarion ug Police Officer 1 Danny Giovanni.