ILIGAN CITY -- Miabot ngadto sa kapin 400 ka mga empleyado sa Lanao Sur Electric Cooperative (Lasureco) ang naapektuhan ug namiya sa ilang mga panimalay sa Marawi City, tungod sa nagpadayong giyera tali sa puwersa sa gobyerno ug sa lokal nga teroristang Maute Group, nga nagsugod Mayo 23, sa nasangpit nga dakbayan.
Apan bisan paman sa ilang sitwasyon, padayon gihapon sila sa ilang trabaho aron ma-energize o mabalik ang kuryente sa Marawi taliwala sa nagpadayong pinusilay tali sa duha ka kampo sulod na sa kapin duha ka semana.
"Maawa naman kayo mga kapatid na Maute, maraming kamag-anak kayong namamatay at nawalan ng tirahan. Kung may hinanakit kayo sabihin niyo sa kanila at nandiyan naman mga (cabinet) secretary na Maranaw. lwanan niyo Marawi, maawa naman kayo," panawagan ni Lasureco general manager Nordjiana Ducol.
Nanawagan usab si Ducol ngadto sa gobyerno nga undangon na ang airstrike.
"Sana wala ng airstrike. Infantry to infantry na lang dahil nag-suffer na ang maraming tao," dugang ni Ducol.
Dili pa lamang dugay, midawat ang mga empleyado og hinabang gikan sa National Grid Corporation of the Philippines (NGCP) human nila napabalik ang 20 porsiyento sa Marawi ilabina ang dapit sa may Mindanao State University Campus.
Gihimo ang pagpanghatag sa mga relief goods sa ilang sattelite office sa Barangay Tomas Cabili, ning dakbayan.
Sulod sa plastic box ang bugas, blanket first aid kit, tsinelas, hygiene kit, dignity kit alang sa mga babaye ug uban pa.
Matud pa ni Mark Vincent Israel, Corporate Social Responsibility officer sa NGCP, nga ang ilang paghatag og tabang ngadto sa mga apektadong empleyado sa Lasureco maoy pagpakita sa NGCP og importansiya sa ilang mga kostumer.