NAKUHA ang 11 ka pakete sa gituohang shabu sa patay’ng lawas sa usa ka lalaki nga napalgan niadtong Miyerkules sa buntag, Hunyo 28, sa Barangay Emelda, dakbayan sa Villanueva, Misamis Oriental.
Si Villanueva Police Station Chief Rodney Gaid miingon nga sa hilit nga dapit napalgan ang patay’ng lawas nga nagpabilin nga walay identipikasyon niining panahona.
Gihulagway kini ni Gaid nga niwangon, 5'2 ang katas-on ug gibana-banang adunay 20 ngadto 30 anyos ang pangidaron.
Nakita sa mga polis nga aduna kini samad sa ulo.
Si Doktor Christian Caballes, kinsa nangulo sa Scene of Crimes Operatives, nibutyag nga ang samad sa ulo niini pinusilan ug nakuhaan mokabat 11 ka pakete sa gitouhang shabu sa bulsa niini.
Nanawagan si Gaid nga kadtong nawad-an og sakop susihon kini o makigkoordinar sa ilang buhatan. (SVB)