NAGHATAG og nagkadaiyang reaksyon ang pipila ka mga relihiyosong grupo sa plano sa kagamhanan nga lugwayan ngadto sa lima ka tuig ang martial law nga matapos na karong Hulyo 24.
Si Monsignor Perseus Cabunoc, kura paruko sa St. Augustine Cathedral Church namahayag nga kung rebellion lamang ang hinugdan nganong ipadayon ang martial law nga sukad pa kaniadto wala man nawala ang rebellion.
Ang terorista dili mawala sa kalibutan ug walay makakontrol niini. Ang rebellion anaa kanunay ug bisan kinsa mosupak man niini tungod kay ang mga tawo diskuntento kanunay.
Gawas niini maapektuhan sab ang ekonomiya sa nasod kung ipadayon kini. Mas importanteng wagtangon ang korapsyon ug ipadayon ang mga maayong plano alang sa nasod.
Sa iyang bahin sab ni Iglesia Filipina Independiente Archbishop Felixberto Calang namahayag nga supak na gani siya sa martial law karon unsa pa kaha kining moabot og lima ka tuig.
Usa sa gikabalaka niini nga basin unya og mayatakan og katungod ang katawhan ug masubli ang nahitabo kaniadto sa administrasyon ni Marcos.
Kahinumduman giplano sa kagamhanan ni Presidente Rodrigo Duterte nga lugwayan ang martial law dinhi sa pulo sa Mindanao ngadto sa lima ka tuig. (SVB)