KUMPIRMADONG giila sa pamilya ang patay nga lawas nga napalgan sa baybayon sa Zone 8, Lower Bulua ning dakbayan sa Cagayan de Oro niadtong milabay nga semana.
Ang biktima nailang si Edwin Dagapioso, 24, ulitawo, taga Zone-12, Zayas, Barangay Carmen ning dakbayan.
Sa impormasiyon nga nahipos gikan sa kapolisan, gikompirma sa pamilya nga ilang kabanay ang biktima kinsa na-missing niadtong Hulyo 4 ning tuig human nga nagligo-ligo kauban sa menor de edad nga igsoon sa Iponan River.
Gibutyag sa pamilya nga positibo nga ila kining kabanay pinaagi na usab sa nakitang peklat sa dapit sa walang bahin sa mata agi og dinunggaban lakip na sa borloloy nga gisul-ob sa iyang tiil.
Napatik sa pamantalaan sa SunStar SuperBalita niadtong Hulyo 6 ning tuig ang maong insidente human kini napalgang naglutaw ug wala pay identipikasiyon niadtong panahona diin wala’y nakitang foul play sa patay nga lawas ang mga otoridad.
Sa pagkakaron, ang patay nga lawas ang gi-atiman na sa nahabiling pamilya.