Sunog sa hotel miabot og 12 oras | SunStar

Sunog sa hotel miabot og 12 oras

Time to read
1 minute
Read so far

Sunog sa hotel miabot og 12 oras

Friday, July 14, 2017

MILUNGTAD og mga 12 oras na ang sunog una gideklarar nga under control sa Bureau of Fire and Protection (BFP) ang pag-ulbo sa kalayo nga nilamoy sa usa ka hotel sa Cogon, dakbayan sa Cagayan de Oro.

Mokabat sa P7 milyones ang inisyal nga natalang danyos ug gilauman nga motaas pa kini kon modeklara na ang tag-iya sa Hotel Conchita og danyos.

Sa pagsulat ning balita Biyernes, anaa na sa 85 porsyento sa maong building ang gilamoy sa kalayo.

Sa pakighinabi sa SunStar SuperBalita kang Senior Fire Officer 1 Dennis Dales, Chief Investigator sa City Fire District, gibutyag niini nga ang alarma gabii pa lang sa adlaw'ng Huwebes, Hulyo 13.

“One step behind nana sa general alarm ang task force bravo, gabii gisaka nato sa Task Force Bravo wala pa ta nag declare og fire-out karon, kana padulong na sa pagkapalong pero di pa ta maka declare og fire-out, naglisod ta kay naa man gud sa sulod unya sementado,” pahayag ni Dales.

Gikabutyag nga nagsumikad ang pag-ulbo sa kalayo sa Palaña grocers ug daling mikuyanap sa ibabaw nga bahin sa hotel.

Dili pa usab masuta ang tinuod nga hinungdan sa sunog karong panahona apan dili usab nila balewala-on ang posibilidad nga gituyo ang nahitabong sunog.

“Wala pa na’y cause nga atong nakita, ang kanang angle posible nato nang ma-consider pero ato nang isa-isahon,” dugang pahayag ni Dales.

Gibutyag ni Kapitan Jaime Frias sa Barangay 23 ning dakbayan, kinsa usa sa mga nakasaksi sa pag-ulbo sa kalayo, niingon nga nagsumikad ang kalit nga pag-ulbo sa kalayo sa air condition sa patigayon.

Wala pa gideklarar nga fire out ug wala pay natala nga naangol o posibilidad nga aduna’y namatay sa sunog.

Apan giingong aduna’y miyembro sa BFP ang nakuryentehan human nga nasangit ang gas mask sa linya sa kuryente apan wala’y angayang ikabalaka sa kahimtang sa mga biktima.

Gipatik sa mantalaang Superbalita Cagayan de Oro Hulyo 15, 2017.

View Comments