WALO ka mga barangay ang misakmit sa titulong Most Outstanding Lupong Tagpamayapa nga gipili pinaagi sa nagkadaiyang lungsod sa Misamis Oriental.
Kini ang gihatagan og pasidungog pinaagi ni Department of Interior and Local Government (DILG)–Misamis Oriental Provincial Director Edward Bhagwani.
Gisugdan ang kalihokan niadtong Marso hangtud Abril 27.
Migawas nga mga mananaog sa kategorya A kon 1st to 3rd class municipalities mao ang Barangay Binitinan, Balingasag.
Gidawat mismo ni Kapitan Delilah Sunogan ang tropeyo ug cash incentive award nga P25,000.
Ika-duha nga pwesto mao ang Barangay Poblacion, sa lungsod sa Lugait nga gipangulohan ni Kapitan Desiderio Gabe kinsa nakadawat og cash incentive nga P20,000; ug ikatulo nga pwesto ang Barangay Poblacion sa lungsod sa Initao, diin si Kapitan Engracio Gallaroza midawat sa cash incentive nga P15,000.
Samtang sa kategorya B nga ubos sa 4th ngadto 6th class Municipalities nag-una ang Barangay Bonifacio Aquiño, sa lungsod sa Magsaysay diin ang susamang premyo gidawat ni Kapitan Gemelo Cortez.
Ika-duhang pwesto naangkon sa Barangay Aromahon sa lungsod sa Laguindingan pinaagi ni Kapitan Elpedia Lumamba nga malipayon kaayo nga midawat sa tropeyo ug P20,000 cash incentive.
Ang ika-tulo naangkon sa Barangay Poblacion, Sugbongcogon nga gipangulohan ni Kapitan Rolando Rojo kinsa midawat sa tropeyo ug cash incentive nga P15,000.
Alang sa kategorya sa component city, migawas nga mananaog ang Barangay 19 sa dakbayan sa Gingoog pinaagi ni Kapitan Melchor Apolinar ug Barangay 18A, susamang dakbayan pinaagi ni Kapitan Ernesto Quider nga midawat sa ganti nga P25,000 lakip ang trophy.
Gibutyag ni DILG Director Bhagwani nga dugay na nga higayon nga gahimoun kining kalihokan apan kaniadto walay lakip cash incentives apan tungod sa suporta sa kagamhanan sa Misamis Oriental ubos ni Governor Bambi Emano nahatagan og incentives ang mga napiling barangay.
Ang mga nahatagan og award ang nalipay sa pasidungog ug malaumon nga unta sila ang ehemplo sa uban kabarangayan nga himoun ang ilang maayong tahas diha sa pagserbisyo sa katawhan sa barangay.