NAGHILAK na lamang ang usa ka dalaga human nga gibiyaan sa naka-chat sa Facebook sulod sa ilang gi-abangang lawak ug wala kini ikabayad sa ilang renta lakip na sa mga gi-order nga pagkaon nga nahimutang sa Kauswagan, dakbayan sa Cagayan de Oro.
Ang dalaga naila nga si Glenda (bansagon gitago), 34, dalaga, taga Baliwan Seaside, Zamboanga City, samtang ang lalaki naila lamang sa ngalan niini sa Facebook nga Relven Suan, taga Cebu City apan nagtrabaho sa Cagayan de Oro.
Sa nahipos nga impormasiyon gikan sa Carmen Police Station 4, nasayran nga gipatala sa tagdumala sa inn si Glenda human nga wala kini makabayad sa 12 ka oras nga renta sa lawak lakip na sa ilang mga gipang-order nga mga pagkaon, ma-inom ug uban pa.
Nasayran nga nakurat na lang usab si Glenda tungod kay pananghid lamang ni Suan nga molakaw kini kay adunay paliton apan wala na mibalik ug gibiyaan kini lakip na ang bayrunon sa inn.
Gibutyag usab sa biktima nga naka-ila lamang niya si Suan sa social media ug wala kini magdahom nga himuon kini sa lalaki kay lage maayo pa kaayo ang pagtagbo nilang duha sa Westbound terminal.
Gani nagkakita na kini sila sa Zamboanga apan karong panahona dili na ma contact ang duha ka mga numero sa cellular phone.
Sa pagkakaron, ang insidente ang nakatala na sa buhatan sa kapolisan samtang ang babaye ang nagpakitabang kay wala kini kwarta, bisan pamasahe pabalik sa dakbayan sa Zamboanga.