WALA pay identipikasyon ang babayeng napalgang patay mga alas 8 sa buntag Martes, Hulyo 25, ilawom sa tulay sa lungsod sa Tagoloan, Misamis Oriental.
Ang imbestigador nga si Senior Police Officer 4 Tawide Galleon sa Tagoloan Police Station nihulagway sa biktima nga adunay 5'2 ang katas-on, taas og buhok, naka miniskirt ug naka spaghetti top nga kolor itom.
Gituohang nakabsan sa kinabuhi niadtong gabii sa adlaw’ng Lunes.
Napalgan kining biktima sa usa ka helper sa backhoe nga gatrabaho sa tulay ug gitawag dayon sa kapolisan.
Matud ni Galleon nga dihang gisusi kini sa Scene of Crimes Operatives (Soco) sa pagpangulo ni Dr. Christian Caballes, walay nakitang samad o bun-og niini sa kalawasan nga unta timailhan gitamas-tamasan.
Apan abiso karon sa Soco nga ipaubos kini sa otopsiya kay basin aduna pay lawom nga rason nganong namatay ang biktima.
Walay nakaila sa biktima sa dapit bisan gitapokan na kini og bagang dout sa katawhan ug kini mao ang panawagan sa kapolisan nga ma claim kini sa kabanay sa biktima.
Ang patay’ng lawas sa babaye gidala na sa doul nga punerarya sa lungsod.