NANAWAGAN ang kapolisan ning dakbayan sa Cagayan de Oro niadtong mga nalambigit sa ginadiling druga nga mohunong sa maong kalihokan.
Gibutyag ni Police Chief Inspector Ernesto Niebito Daing, hepe sa Police Station 5 (PS5) sa Macabalan, nga nasubo sila nga bisan sa hugot nga kampanya sa ilegal nga druga apan daghan gihapon ang nalabigit niini.
Kini human duna gihapon nga masikop ang kapolisan nga mga bag-ong personahe sa matag karon ug unya.
“Oo daghan pa gihapon, atong mga drug personality, kadtong naa sa watchlist ug newly identified nga maglikay na sila sa involvement sa illegal drug activities, illegal pushing or using kay time will come makuha ra gihaponn nato sila, pareho aning mga nangadakpan,” pahayag ni Daing.
Nasayran nga laing lima ka mga suspetsado ang nasikop sa kapolisan sa PS5 atol sa drug bust sa Piaping Itom, Macabalan ug Block C, Accretion Area, Barangay Macabalan.
Unang nasikop sila si Teodoro Lanaja alyas Matoy, 32, ulitawo, taga Piaping Itom ug maoy target sa operasiyon. Nakuha gikan sa posisyon niini ang mokabat sa .10 nga gimbug-aton sa shabu ug ang laing kauban nga si Christopher Gallogo, 38.
Samtang nasikop usab ang laing suspek nga si Cydel Beja, 27, ulitawo nga taga Block C, Accretion Area ug kinsa giingong mitahan na sa kapolisan kaniadto.
Lakip sa nasikop ang mga kauban nga sila si Jeffrey Flores, 30, ulitawo nga taga Parola ug Mark Anthony Abonitalla, 34, minyo ug pulos residente sa maong dapit.
Gibutyag ni Daing nga kanhi na mitahan ang suspek sa ilang buhatan apan wala kini molakip sa rehab ug nagpadayon gihapon sa ilegal nga kalihokan.
“Surrenderee unya wala ni apil og community based rehab tapos naa pud ni siya sa among link analysis pud, kini iyang mga kauban mga newly identified nga mga drug personalities, nakuha nato sa ilaha ang 2.51 grams ug naay street value nga P12,700” pahayag ni Daing.
Sa pagkakaron, ang mga dinakpan ang nagtingkagol na sa mini-cell sa PS5 alang sa tukmang disposasiyon.
Nasayran nga bisan pa man sa hugot nga kumpanya batok sa ilegal nga druga daghan pa gihapon ang mga nangasikop ug mga nilambigit sa ilegal nga kalihokan.