USA ka gituohang sakop sa New People’s Army (NPA) ang patay samtang ubay-ubay nga gitouhang miyembro sa grupo ang samaran sa engkwentro nga nahitabo niaging adlaw sa Barangay Bukang Liwayway, lungsod sa Kibawe, Bukidnon.
Ang pagbinayloay og bala tali sa NPA ug mga sakop sa Special Forces Battalion sa 403rd Brigade sa 4th Infantry Division ang miabot ngadto sa 20 minuto ug miatras ang kontra sa gobyerno dihang giingong napatyan ilang sakop ug daghan ang nasamdan.
Nagpahigayon ang kasundalohan og focused military operation sa lugar human gakadawat og mga report nga anaa ang presensya sa mga armadong grupo sa dapit nga daw gapangilkil kanila lakip ang pagpanghasi sa ilang lugar.
Apan atol sa operasyon, ilang naagbat ang walhong grupo nga miresulta sa pagsinukliay og bala. Dihang natapos narekober sa kasundalohan ang upat ka rifle granade, landmine, M16 rifle ug ubay ubay pa nga gamit.
Si Colonel Eric Vinoya kinsa commander sa 403rd Birgade hugot nga mikondena sa mga pagpangatake nga gabuhaton sa mga NPA. Nagpadayon gihapon iyang panawagan nga unta mobalik na sila sa sabakan sa gobyerno. (SVB)